Paul Pogba បានទម្លាយថារូបគេស្ទើរតែនឹងចូលរួមជាមួយ Real Madrid ទៅហើយ មុនពេលសម្រេចជោគជ័យក្នុងការត្រឡប់មក Manchester United វិញ ហើយក្នុងករណីនេះ រូបគេថាមិនមានការស្ដាយក្រោយនោះទេ ដែលមិនបានលេងឲ្យReal Madrid ។
ខ្សែបម្រើវ័យ២៤ឆ្នាំបានត្រឡប់ទៅកាន់ទឹកដី Old Trafford វិញក្នុងរដូវក្ដៅឆ្នាំ ២០១៦ក្នុងតម្លៃ៨៩.៣លានផោន។រូបគេមានទំនាក់ទំនងធ្វើការផ្ទេរទៅលេងនៅក្លឹបយក្ស La Liga ពិសេស Real Madrid ដែលជាជម្រើសមួយសម្រាប់កីឡាករបារាំងម្នាក់នេះសម្រេចចិត្ត។
ក្នុងកម្មវិធី Beyond The Pitch របស់ទូរទស្សន៍កីឡាមួយ កីឡាករសញ្ជាតិបារាំងបាននិយាយថា៖” និយាយឲ្យស្មោះត្រង់ទៅ Real Madrid បានមកដល់ខ្ញុំ ហើយខ្ញុំក៏បានគិត ពីការទៅទីនោះ។ ហើយខ្ញុំក៏បានគិតមកកាន់ Manchester United ដែរ។ វាតែងតែស្ថិតក្នុងបេះដូងខ្ញុំរហូត។ បេះដូងរបស់ខ្ញុំបានណែនាំឲ្យខ្ញុំមកទីនេះ ខ្ញុំមិនដឹងថាហេតុអ្វី ខ្ញុំមិនដឹងមានរឿងអីកើតឡើងនោះទេ”។
ចាប់តាំងពីត្រឡប់មកលេងនៅ Manchester United, Pogba រកបាន១២គ្រាប់ហើយក្នុងការចូលលេង៦៣ប្រកួតហើយទម្រង់លេងរបស់គេកំពុងត្រូវបានគេគិតថា តើកម្រិតកំពូលនៃដំណែងខ្សែបម្រើរបស់គេអស់ហើយឬនៅ? ទោះបីជាបច្ចុប្បន្នរូបគែជាកីឡាករមានតម្លៃខ្លួនខ្ពស់ជាងគេនៅក្នុងក្លឹប Pogba បានក្លាយជាកីឡាករសំខាន់របស់លោក Jose Mourinho ប៉ុន្តែរូបគេនឹងក្លាយជារឿងមួយផ្សេងទៀតបើទៅលេងនៅ Real Madrid ជំនួស Man Utd។
“ប៉ុន្តែខ្ញុំបានសម្រេចចិត្ត ខ្ញុំគ្មានការស្ដាយក្រោយអីទេ ខ្ញុំមិនដែលសោកស្ដាយនូវជម្រើសរបស់ខ្ញុំនោះទេ“៕
