ទម្រង់លេងដ៏ល្អ ស៊ីគ្រាប់បាល់តាមសមត្ថភាពដែលរកបាន ហើយការពារខ្លាំង ធ្វើឲ្យក្រុមជម្រើសជាតិអាល្លឺម៉ង់ ឈ្នះពានWorld Cup ៤សម័យកាលរួចមកហើយ ប៉ុន្តែគ្រូបង្វឹកអាហ្សង់ទីនលោក Jorge Sampaoli ថាអត់ចូលចិត្តទម្រង់លេងបែបនេះសោះ។
គ្រូបង្វឹករូបនេះបាននាំក្រុមពពកសអាហ្សង់ទីនឡើងលេង World Cup 2018 ក្រោយពេល Messi រកបានបីគ្រាប់ម្នាក់ឯងយកឈ្នះអក្វាឌ័រ ក្នុងជុំចុងក្រោយវគ្គជម្រុះតំបន់ CONMEBOL។ ចំណែកឥទ្រ្ទីដែកអាល្លឺម៉ង់ឆ្លងកាត់ការប្រកួតក្នុងពូលវគ្គជម្រុះតំបន់អឺរ៉ុប ហើយក្រុមមួយនេះជាគីឡូធ្ងន់ដែលឈ្នះ World Cup ដោយបំបាក់អាហ្សង់ទីននៅវគ្គផ្ដាច់ព្រ័ត្រ។
Sampaoli បានលើកពីប្រេស៊ីល បារាំង និងអេស្ប៉ាញជាក្រុមធំៗដែលអាចលើកពាន World Cup ឆ្នាំក្រោយ ប៉ុន្តែលោកមិននិយាយពីអាល្លឺម៉ង់ទេ ដោយសារអត់ចូលចិត្តទម្រង់លេងរបស់ក្រុមឥទ្រ្ទីដែកមួយនេះ។ និយាយក្នុងសន្និសិទកាសែតពេលចូលរួមកម្មវិធីសាលាបាល់ទាត់មួយលោកបាននិយាយថា៖
” ខ្ញុំគិតថា ប្រេស៊ីល អេស្ប៉ាញ និងបារាំងកំពុងស្ថិតក្នុងជំហានមុខគេគឺនៅលើកម្រិតរបស់ពួកយើង។ ទម្រង់លេងរបស់ពួកគេគឺល្អមើល ហើយជាបេក្ខភាពអាចប្រកួតប្រជែងពាននៅឆ្នាំក្រោយ។ ខ្ញុំមិនផ្ដោតទៅលើក្រុមអាល្លឺម៉ង់ ដោយសារតែខ្ញុំបំភ្លេចពួកគេទៅហើយ ពីព្រោះខ្ញុំមិនចូលចិត្តវិធីដែលពួកគេលេង”៕
