ក្រុមក្រសួងការពារជាតិបើទ្វារកីឡដ្ឋានរបស់ខ្លួន ស្វាគមន៍ក្រុមភ្ញៀវ ព្រះខ័នរាជស្វាយរៀង ក្នុងព្រឹត្តិការណ៍កីឡាបាល់ទាត់ ដណ្តើមពានរង្វាន់សម្ដេចអគ្គមហាសេនាបតីតេជោ ហ៊ុន សែន រដូវកាលឆ្នាំ២០១៧ កាលពីយប់មិញ បានត្រឹមលទ្ធផលស្មើគ្នា ១ទល់១ ក្នុងជំនួបការប្រកួតវគ្គជម្រុះជុំទី៥ ជើងទី១ ៨ក្រុមចុងក្រោយ នៅកីឡដ្ឋានស្តាតចាស់។
ជំនួបរវាងក្រុមខ្លាំងទាំងពីរលីគកំពូលកម្ពុជានេះដែរ នៅក្នុងការប្រកួតវគ្គទី១ ក្រុមម្ចាស់ផ្ទះ ក្រសួងការពារជាតិបានបើកការនាំមុខលើក្រុមភ្ញៀវ ១គ្រាប់មុន ដែលធ្វើសម្រេចដោយកីឡាករ រឿម ចាន់រឿន ហើយនៅវគ្គទី២ ក្រុមព្រះខ័នរាជស្វាយរៀង តាមបានស្មើវិញ ១ទល់១ ដោយរកបានដោយកីឡាករ សារ៉េត គ្រីយ៉ា។ ក្រុមទាំងពីរនឹងត្រូវបន្តជួបគ្នានៅជើងទី២ នាពេលខាងមុខ នៅផ្ទះ ព្រះខ័នរាជស្វាយរៀង ដើម្បីកាត់សេចក្តីថា តើក្រុមណាអាចឡើងទៅវគ្គ១/២ ជាមួយ៣ក្រុមផ្សេងទៀត។
ចំពោះ២ប្រកួតផ្សេងទៀត ទីលានផ្សេងៗពីគ្នា សម្រាប់វគ្គ៨ក្រុមចុងក្រោយ នេះដែរ គឺក្រុមគីរីវង់សុខសែនជ័យ ប្រកួតស្មើគ្នាជាមួយក្រុមបឹងកេត ដោយលទ្ធផល ២ទល់២ លើទីលានគីរីវង់សុខសែនជ័យ នៅខេត្តតាកែវ។ នៅវគ្គទី១ គីរីវង់សុខសែនជ័យ នាំមុខ២ទល់០មុន ហើយនៅវគ្គទី១ ទើបបឹងកេតតាមបាន២គ្រាប់ស្មើគ្នាវិញ។ ២គ្រាប់របស់គីរីវង់សុខសែនជ័យ រកបានដោយកីឡាករ ឯម ផាន់ណា និងកីឡាករ ណុប ចាន់តារារស្មី ខណៈ២គ្រាប់របស់បឹងកេតរកបានកីឡាករ ស៊ុន សុវណ្ណរិទ្ធី និង សេប រ៉ូហ្ស៊ីប។
ដោយឡែក ក្រុមអគ្គីសនីកម្ពុជា ឈ្នះក្រុមអគ្គស្នងការដ្ឋាននគរបាលជាតិ ដោយលទ្ធផល ១ទល់០ លើទីលានកីឡដ្ឋានខេត្តស្វាយរៀង ដោយមួយគ្រាប់ជ័យជម្នះនេះរកបានដោយកីឡាករ ធារី ចន្ថាប៊ីន។ ចំពោះមួយគូទៀតនឹងធ្វើឡើងនៅថ្ងៃពុធ ទី១ ខែវិច្ឆិកា ខាងមុខរវាងក្រុមភ្នំពេញក្រោន ជាមួយណាហ្គាវើល លើទីលានកីឡដ្ឋាន RSN Stadium។ ក្រុមទាំង៨នេះនឹងត្រូវបន្តជួបគ្នាចំនួន២ជើងដូចៗគ្នា ដើម្បីកាត់សេចក្តីថាតើក្រុមណាជាក្រុមខ្លាំងពិតប្រាកដដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ នាពេលខាងមុខ។
សម្រាប់រូបមន្តប្រកួតរបស់សហព័ន្ធកីឡាបាល់ទាត់កម្ពុជា បានឲ្យដឹងថា ប្រកួតពានរង្វាន់សម្តេចតេជោ ហ៊ុន សែន ឆ្នាំ២០១៧នេះ ត្រូវបានបែងចែកជា៥ដំណាក់កាល ដោយប្រើពេលជាង១០ខែ ចាប់ពីថ្ងៃទី១៨ ខែមករា ដល់ថ្ងៃទី២៧ ខែធ្នូ ឆ្នាំ២០១៧ ខណៈការប្រកួតដំណាក់កាលទី១ និងទី២ ជាវគ្គជម្រុះតាមបណ្តារខេត្ត ហើយវគ្គទី៣ជាការប្រកួតរវាងក្រុមជើងខ្លាំងតាមខេត្តជួបក្រុមលីកលំដាប់ទី២ និងក្រុម៤ក្រុមបាតតារាងនៃពានរង្វាន់លីកកំពូលកម្ពុជា ឆ្នាំចាស់ ហើយវគ្គទី៤ ជាការប្រកួតរវាងក្រុមខ្លាំងជាងគេ៦នៅក្នុងលីកជាមួយក្រុមខ្លាំងមកពីជុំទី៣ និងចុងក្រោយជុំទី៥ ជាការប្រកួតចាប់ពីវគ្គ៨ក្រុមចុងក្រោយដល់វគ្គផ្ដាច់ព្រ័ត្រ៕
