អ្នកចាំទីសញ្ជាតិឥណ្ឌូណេស៊ី មួយរូបមានឈ្មោះថា Choirul Huda ដែលកីឡាករនៃក្រុម Persela Lamongan សមាជិកក្លិបនៅលីគកំពូលឥណ្ឌូនេស៊ី បានស្លាប់ក្រោយការប៉ះទង្គិចជាមួយមិត្តរួមក្រុម និងកីឡាករម្នាក់ទៀតនៃក្រុម Semen Padang ក្នុងការប្រកួតលីគកំពូលឥណ្ឌូណេស៊ី ថ្ងៃអាទិត្យម្សិលមិញ។
ការប៉ះទង្កិចបានកើតឡើងនៅមុខទីរបស់ខ្លួន គ្រាដែល Choirul Huda ព្យាយាមទប់ស្កាត់បាល់ ចំពេលដែលខ្សែប្រយុទ្ធ Marcel Sacramento របស់ក្រុម Padang និងមិត្តរួមក្រុមរបស់ខ្លួន គឺខ្សែការពារ Ramon Rodrigues កំពុងប្រជែងបាល់ពីគ្នា ដែលធ្វើអោយ Huda រងរបួសក្បាលធ្ងន់ធ្ងរ។
ភ្លាមៗក្រោយកើតហេតុ Huda ត្រូវបានបញ្ជូនទៅកាន់មន្ទីរពេទ្យ ប៉ុន្តែក្រោយចប់ការប្រកួត រូបគេត្រូវបានក្លិបប្រកាសថាបានស្លាប់ នៅវេលាម៉ោង ៥និង១៥នាទី ល្ងាចថ្ងៃដដែល។
ទស្សនាវីដេអូនៃការប៉ះទង្គិចគ្នា៖
គួរបញ្ជាក់ថា Choirul Huda បច្ចុប្បន្នមានវ័យ៣៨ឆ្នាំ និងបានចាប់ផ្ដើមចាប់អាជីពជាកីឡាករបាល់ទាត់តាំងពីឆ្នាំ ១៩៩៩ ជាមួយក្លិបតែ១គត់ គឺក្លិប Persela Lamonganម នេះផ្ទាល់តែម្ដង ខណៈរយៈពេល១៨ឆ្នាំ Choirul Huda បានបង្ហាញខ្លួនបាន ៥០៣ ប្រកួតក្នុងនាមជាអ្នកចាំទី។
Choirul Huda ក៏ត្រូវអ្នកគាំទ្រសញ្ជាតិឥណ្ឌូនេស៊ី ចាត់ទុកជាវីរៈបុរសបាល់ទាត់នៅក្នុងស្រុកផងដែរ បើទោះបីជាកីឡាកររូបនេះមិនដែលជាប់ជម្រើសជាតិក៏ដោយ៕
រូបភាព: bolasport
វីដេអូ: TVone
