ខ្សែបម្រើ Andres Iniesta ត្រូវបានបង្ហាញខ្លួនជាសមាជិកថ្មីរបស់ក្លិប Vissel Kobe ជាផ្លូវការហើយនៅថ្ងៃព្រហស្បតិ៍ទី២៤ខែឧសភាឆ្នាំ២០១៨នេះ ដោយពាក់អាវលេខ៨ដូចកាលនៅ Barcelona។

ម្ចាស់ក្លិប Vissel Kobe លោក Hiroshi Mikitani និយាយថា៖ “ខ្ញុំមានសេចក្ដីសោមនស្សដើម្បីប្រកាសថា Andres Iniesta នឹងលេងឱ្យ Vissel Kobe បន្ទាប់ពីមានអាជីពជាប្រវត្តិសាស្ត្រនៅ Barcelona។ Iniesta ជាកីឡាករលំដាប់កំពូលរបស់ពិភពលោក។ Iniesta នឹងមិនត្រឹមតែជួយពង្រឹងការលេងរបស់ក្រុមប៉ុណ្ណោះទេ តែថែមទាំងរួមចំណែកដល់ការអភិវឌ្ឍនៃកីឡាករជំនាន់ក្រោយផងដែរតាមរយៈការដាក់បញ្ចូលរូបមន្តរបស់ Iniesta ក្នុងថ្នាលយុវជន”។

ម្ចាស់ក្លឹបដដែលខាងលើបានបន្ថែមទៀតថា៖ “យើងជឿជាក់ថាការសម្រេចចិត្តរបស់គាត់ក្នុងការមកជប៉ុន នឹងមានឥទ្ធិពលខ្លាំងមិនត្រឹមតែលើ Vissel Kobe ទេ តែលើបាល់ទាត់ក្នុងប្រទេសជប៉ុននិងទ្វីបអាស៊ី។ Iniesta នឹងលើកមុខមាត់បាល់ទាត់ជប៉ុនទៅកាន់សកលលោក”។

Iniesta វ័យ៣៤ឆ្នាំ បានស៊ុតឱ្យអេស្ប៉ាញឈ្នះជើងឯក World Cup ជាលើកដំបូងក្នុងប្រវត្តិសាស្ត្រកាលពីឆ្នាំ២០១០ និងជាសមាជិកសំខាន់ដែលជួយអេស្ប៉ាញគ្រងជើងឯក Euro 2008 និង 2012។