ស្របពេលដែលម៉ាឡេស៊ីទទួលធ្វើជាម្ចាស់ផ្ទះព្រឹត្តិការណ៍កីឡាប្រចាំតំបន់អាស៊ីអាគ្នេយ៍ SEA Games 2017 រដ្ឋមន្រ្តីក្រសួងយុវជន និងកីឡាម៉ាឡេស៊ី បានដាក់ចេញនូវយុទ្ធនាការមួយដែលមានឈ្មោះថា «មេដាយមួយ ដើមឈើមួយដើម»។
យុទ្ធនាការ “One Medal, One Tree” ត្រូវបានធ្វើឡើងកាលពីព្រឹកថ្ងៃទី០២ ខែសីហា ឆ្នាំ២០១៧ កន្លងទៅថ្មីៗនេះ ដែលជាការចាប់ផ្ដើមដំបូង ក្រោមការដឹកនាំរបស់ លោក YB Brig Jen Khairy Jamaluddin រដ្ឋមន្ត្រីក្រសួងយុវជន និងកីឡាម៉ាឡេស៊ី នាកីឡដ្ឋាន Bukit Jalil ផ្ទាល់តែម្ដង។
យុទ្ធនាការនេះ នឹងធ្វើឡើងជា៣ជំហ៊ាន ដោយជំហ៊ានដំបូងដែលបានធ្វើរួចរាល់កាលពីព្រឹកថ្ងៃទី០២ ខែសីហា ស្របពេលជំហ៊ានទី២ នឹងប្រគល់ជូនគ្រាប់ពូជនៃដើមឈើដល់អត្តពលិកដែលឈ្នះមេដាយគ្រប់ប្រភេទ និងជំហ៊ានទី៣ តម្រូវអោយអត្តពលិកដែលឈ្នះមេដាយមាសដាំគ្រាប់ពូជដើមឈើ ក្រោយបញ្ចប់ព្រឹត្តិការណ៍ជាផ្លូវការ។
ដើមឈើដែលត្រូវបានត្រៀមសម្រាប់ដាំរួមមានចំនួន ៥២៤៩ ដើម តាមចំនួនមេដាយសរុបដែលនឹងប្រគល់ជូនអត្តពលិកដែលចូលរួមប្រកួតប្រជែងគ្រប់វិញ្ញាសា ទាំងនៅក្នុងព្រឹត្តិការណ៍កីឡា SEA Games ក៏ដូចជាព្រឹត្តិការណ៍កីឡា ASEAN Para Games ដូចគ្នាផងដែរ។
គួររំលឹក ការប្រកួតព្រឹត្តិការណ៍កីឡាប្រចាំតំបន់អាស៊ីអាគ្នេយ៍ SEA Games លើកទី២៩ នឹងចាប់ផ្ដើមពីថ្ងៃទី១៤ ខែសីហា តទៅសម្រាប់ការប្រកួត ប៉ុន្តែនឹងធ្វើពិធីបើកជាផ្លូវការនៅថ្ងៃទី១៩ រហូតដល់ថ្ងៃទី៣០ ខែសីហា ឆ្នាំ២០១៧ ដោយមានកីឡាដែលដាក់អោយប្រកួតចំនួន៣៨ប្រភេទ និងមាន៤០៥ វិញ្ញាសាប្រកួត ស្មើនឹង ៥២៤៩ មេដាយ៕
រូបភាព: Kuala Lumpur 2017
